Odamlardan tinglab hikoya

Kitob tavsifi

Atoqli yozuvchi Xayriddin Sultonning “Odamlardan tinglab hikoya” to‘plamini mutolaa qilar ekansiz, u maʼnaviy mulkingiz, bir umrlik hamrohingiz, do‘stingiz, darddoshingizga aylanib qolganini yurakdan his etasiz. Xo‘sh, ushbu kitobni ko‘nglimizga yaqin qilgan, o‘qishliligi, muvaffaqiyatini belgilab bergan jihatlar nimalardan iborat? Avvalo, muallif hassos shoir Hamid Olimjonning bizni bolalikning sirli, sehrli olamiga yetaklovchi, har birimizning qalbimizda iliq va qadrdon xotiralarni uyg‘otuvchi go‘zal satrini kitobga nom sifatida tanlab olgan. “Odamlardan tinglab hikoya”. Birgina ushbu misraning o‘zi bizni odamlar, uzoq yillardan buyon shirin diydoriga talpinib yashayotganimiz — boboyu buvilarimiz, ota-onamiz, do‘stu yaqinlarimiz haqida o‘ylashga undaydi. Ular bilan kechgan dilbar suhbatlar, qiziqdan-qiziq hangomalar, voqea-hodisalarni yodga soladi. Shu orqali ularning yorqin qiyofasi ko‘z oldimizda yana bir bor jonlanadi. Xayriddin Sultonning ushbu kitobini o‘qish asnosida ham ana shunday sog‘inchli hislar olamiga tushib qolamiz. Chunki to‘plamga kiritilgan hayotnomalarni muallif to‘qib chiqargan emas, u faqat do‘stu yaqinlaridan, zamondoshlaridan eshitgan voqea-hodisalarni, esdaliklarni, kechinmalarni qog‘ozga tushirgan, xolos