Odil Yoqubov 1926-yil 20-oktyabrda hozirgi Janubiy Qozogʻiston viloyatining Qarnoq qishlogʻida tugʻilgan. Oʻzbekiston xalq yozuvchisi (1985). ToshDUning filologiya fakultetini tamomlagan (1956). Dastlabki asari – “Tengdoshlar” qissasi 1951-yilda eʼlon qilingan. Shundan soʻng yozuvchining “Dastlabki qadam” (1953), “Ikki muhabbat” (1955), “Muqaddas (1960), “Tilla uzuk”, “Bir felyeton qissasi” (1961), “Qanot juft boʻladi”, “Matluba” (1970) qissa va hikoyalar toʻplamlari nashr etilgan. “Er boshiga ish tushsa…” (1966), “Ulugʻbek xazinasi” (1973), “Koʻhna dunyo” (1982), “Diyonat” (1977), “Oqqushlar, oppoq qushlar” (1988), “Adolat manzili” (1998) kabi romanlar muallifi. “Chin muhabbat” (1955), “Aytsam tilim, aytmasam dilim kuyadi”, “Yurak yonmogʻi kerak” (1958), “Olma gullaganda” (1961), “Muzaffar Temur” (1996), “Bir koshona sirlari” (2000) kabi pyesalar, “Dilbarim”, “Bahor yomgʻirlari” kinossenariylari ham bor (1971). Odil Yoqubov 2009-yil 21-dekabr kuni Toshkent shahrida vafot etdi. Hamza nomidagi Oʻzbekiston Davlat mukofoti laureati (1977), “Doʻstlik” (1994), “El-yurt hurmati” (1998) ordenlari bilan mukofotlangan.