Frans Kafka

Frans Kafka 1883-yilning 3-iyulida Praga shahrida tugʻilgan. Otasi oʻz mehnati tufayli shaharda kichikroq bir fabrikaning egasi boʻlgan. Kafka Pragadagi nemis gimnaziyasini tugatib, 1901 – 1905-yillarda Praga universitetida huquqshunoslikni oʻrgandi, sanʼat tarixi va olmonshunoslik boʻyicha maʼruzalar tingladi. 1906 – 1907-yillarda Praga shahar sudining advokatlar idorasida amaliyot oʻtadi. 1907-yilning oktyabridan boshlab xususiy sugʻurta jamiyatiga xizmatga kirdi. 1908-yilda Praga tijorat akademiyasida shu ixtisoslik boʻyicha malakasini oshirdi. Shundan soʻng u turli kam ish toʻlanadigan tashkilotlarda ishlagan. 1917-yilda Kafka sil kasaliga duchor boʻladi, 1922-yilda nafaqaga chiqadi. 1923-yili Berlinga ketadi, lekin sogʻligining yomonlashuvi sababli Pragaga qaytishga majbur boʻladi. Frans Kafka 1924-yilning 3-iyunida Vena shahri atrofidagi Kirling sanatoriyasida vafot etadi. Asarlari: «Bir kurash tarixi» (1902-1903, birinchi asari), «Qurilish» (1923, oxirgi asari), «Amerika» (1911-1916, birinchi romani), «Jarayon» (1915-1918, ikkinchi romani), «Qoʻrgʻon» (1921-1922, oxirgi romani), «Evrilish», «Hukm», «Jazo koloniyasida», «Ochlik ustasi», «Otamga xat» va boshqalar.