Salim Ashur

Salim Ashur 1964-yil 16-dekabrda Tojikiston Respublikasining Qoʻrgʻontepa viloyati Qoʻrgʻontepa tumanida dehqon oilasida tugʻildi. Salim Ashurning ota-onasi Surxondaryo viloyatining Qiziriq tumaniga koʻchib oʻtadi va Salimning bolalik hamda oʻsmirlik yillari Qiziriq choʻllarida kechadi. U 1982-yili shu yerdagi oʻrta maktabni tugatib, Toshkent Davlat universitetining jurnalistika fakultetiga oʻqishga kiradi va uni 1989-yilda tugatadi. Uning ilk sheʼrlari 6-sinfda oʻqiyotgan kezlarida tuman gazetasida bosiladi. Respublika matbuotida esa shoirning birinchi sheʼri 1979-yili «Gulxan» jurnalida chop etilgan. Salim 1990-1994-yillari «Saodat» jurnalida, 1994-1996-yillari esa «Oʻzbekiston ovozi» gazetasida ishlaydi. Hozir u «Turkiston» gazetasida bosh muharrir boʻlib ishlamoqda. Salim Ashur oʻz ijodi bilan respublika matbuotida muntazam qatnashib, sheʼrlari qator jamoa toʻplamlarida chop etiladi. 1994-yili shoirning «Yashil giyoh» va «Atirgul» kabi sheʼriy kitoblari nashr etiladi. Shuningdek, «Atalgan kunlar» (2004), «Sensiz» (2005), «Darz» (2005) toʻplamlari nashr etildi. U bir qator sheʼriy va nasriy tarjimalari bilan ham oʻquvchi eʼtiborini qozongan.