Anvar Obidjon

Anvar Obidjon Fargʻona viloyati Oltiariq tumanining Poloson qishlogʻida 1947-yilning 8-yanvarida xizmatchi oilasida tugʻilgan.
1964-yilda oʻrta maktabni tugatgach, Samarqand moliya texnikumida, 1969-1971-yillarda jamoa xoʻjaligida hisobchi, klub mudiri, tuman gazetasi, viloyat radiosida turli vazifalarni bajardi, Toshkent Davlat universitetining jurnalistika fakultetini sirtdan tamomladi.
1981-yildan boshlab u Toshkentga koʻchib kelib, «Yosh gvardiya» nashriyotida, «Yosh kuch», «Mushtum» jurnallarida ishladi. «Choʻlpon» nashriyotida bosh muharrir boʻlib ishlagan.
Anvar Obidjon bolalar adabiyotiga dastlab «Ona Yer», «Bahromning hikoyalari» toʻplamlari orqali shoir sifatida kirib keldi va mavjud ijodiy anʼanalardan foydalangan holda oʻziga xos yoʻl tanladi.«Bulbulning choʻpchaklari», «Gʻalati maktublar», «Kumush uy», «Gurungdagi gaplar», «Ajoyibxona», «Oʻzimizning ansambl», «Ignalarim chiroyli», «Mening kollektsiyam», «Shirin soʻylar jajjivoylar», «Kalamushlar kemasi», «Siz eshitmagan qoʻshiqlar», «Dalalardan bolalarga», «Osmondan tushgan sozanda» turkum sheʼrlari fikrimizga dalildir. Uning «Ona yer» (1974), «Masxaraboz bola» (1980), «Olovjon va uning doʻstlari» (1983), «Bahromning hikoyalari» (1984), «Ey, yorugʻ dunyo» (1983), «Ketmagil» (1985), «Bezgakshamol» (1985), «Juda qiziq voqea» (1987), «Oltin yurakli avtobola» (1988), «Dahshatli Meshpolvon» (1990) kabi sheʼriy, nasriy kitoblari chop etildi.
Bulardan tashqari, adibning «Qoʻngʻiroqli yolgʻonchi», «Pahlavonning oʻgʻirlanishi» Anvar Obidjon soʻnggi yillarda «Ramazon va Gulmat hangomasi» (1992), «Meshpolvonning janglari» (1994), «Alisher ila Husayn yoki uch dono va oʻgʻri» (1996), «Toʻtiqush», «Topsang hay-hay…» kabi qissa, pesa va sheʼr, dostonlarini ham yaratdi.
U«Oʻzbekiston xalq shoiri» unvoniga sazovor boʻlgan (1998).