Valentin Rasputin

Valentin Grigorevich Rasputin (1937. 15. 3, Irkutsk viloyati Ust-Uda qishlogʻi – 2015. 14. 03, Moskva) – rus yozuvchisi. Irkutsk universitetining tarix-filologiya fakultetini tugatgan (1959). Dastlabki hikoyalar toʻplami – “Leshkadan soʻrashni unutibman” (1961). “Narigi dunyoning odami” (1965), “Ayiq terisi sotiladi”, “Osmonga yaqin oʻlka”, “Yangi shaharlardagi gulxanlar” (1966), “Vasiliy va Vasilisa” (1967) singari hikoya va ocherklar toʻplamlari muallifi. “Mariya uchun pullar” (1967), “Soʻnggi muddat” (1970), ayniqsa, “Yasha va yodda tut” (1974) qissalari rus adabiyotida oʻziga xos oʻrin tutgan. U ijodining dastlabki davrida taygada yashovchi kishilarga xos romantikani tasvirlashga, ular irodasini va tabiat bilan uygʻunligini koʻrsatishga koʻproq moyil boʻlgan boʻlsa, keyinchalik kuchli kishilar xarakterini yaratish, ularning murakkab ruhiy olamini, ular bilan jamiyat oʻrtasidagi ziddiyatlarni ochish, ularning jamiyat va tabiat bilan kurashdagi matonatini koʻrsatishga intilgan. Rasputinning “Matyora bilan vidolashuv” (1976) va “Yongʻin” (1985) asarlari yangi rus nasri taraqqiyotida muhim voqea boʻldi. Rasputinning soʻnggi asarlari oʻzbek tiliga tarjima etilgan.