Uchqun Nazarov 1934-yil 27-noyabrda Toshkent shahrida tugʻilgan. Toshkent teatr va rassomchilik institutining rejissyorlik boʻlimida tahsil olgan (1959). Oʻzbekistonda xizmat koʻrsatgan artist (1967). Birinchi hikoyasi – “Odamlar” (1962). “Gʻurur”, “Sadoqat” (1965), “Fido” (1970), “Girdob” (1971), “Jurʼat” (1977), “Oʻzgalar uchun” (1986) singari hikoya va qissalardan iborat toʻplamlari nashr etilgan. “Chayon yili” (2005) trilogiyasi va “Oyna” dramasi (1977) ham bor. Uning “Surayyo”, “Qiz va yigit”, “Shiddat”, “Alangali sohil” va 3 boʻlimdan iborat “Qoʻqon voqeasi” kabi badiiy filmlari tomoshabinlar eʼtiborini qozongan. Yasunari Kavabataning “Uyqudagi nozaninlar” (2001) romanini oʻzbek tiliga tarjima qilgan. Hamza nomidagi Oʻzbekiston Davlat mukofoti laureati (1977). Uchqun Nazarov 2016-yil 17-iyun kuni Toshkentda vafot etdi.