Sobir Rustamxonli

Shoir, publitsist, olim va jamoat arbobi. U 1946-yilda Yordamli tumanining Hamarkent qishlogʻida tugʻilgan. Oʻrta maktabni bitirgach, Boku Davlat universitetining filologiya boʻlimida oʻqigan. “Qishloq yoʻli” degan ilk sheʼri 1964-yilda “Ozarbayjon yoshlari” gazetasida bosilgan. “Adabiyot va injasanʼat” gazetasida, “Yozuvchi” nashriyotida bosh muharrir, Ozarbayjon respublikasi Davlat matbuot qoʻmitasida rais boʻlib ishlagan (1967– 1993). 1990-yilda deputat boʻlib saylandi; u “Vatandosh hamraylish” partiyasi raisi, Milliy Majlis deputatidir. Qirq yildirki, u oʻz sheʼrlari, oʻtli publitsistik asarlari, adabiy-ilmiy maqolalari bilan Ozarbayjon adabiyoti va jamiyatining rivojlanishiga, oʻz xalqi milliy tushunchasining shakllanishiga, yuksalishiga xizmat qilib kelmokda. Uning “Tanimoq istasang” (1970), “Sevgim, sevinchim” (1974), “Xabar kutib” (1979), ʼTanja qapusi” (1981), “Yasha, ona tilim” (1983), “Qon yoddoshi” (1986), “Umr kitobi” (1989), “Oʻlganda bayroqqa oʻralurmen”, “Ichimdagi dard ogʻochi”, “Bu yurt menga tanish”, “Zamon mendan kechar” (1995) kabi yigirmadan ortiq kitoblari bosilgan. Bu asarlarning koʻpchiligi rus, turk va boshqa chet tillarga tarjima qilingan. Ayniqsa, “Umr kitobi” bir necha turkiy tillarga agʻdarilgan va ozarbayjondagi kitobxonlar mehrini qozongan.