Shukur Xolmirzayev

Shukur Xolmirzayev 1940-yil 24-martda Surxondaryo viloyati Boysun tumanida tugʻilgan. Oʻzbekiston xalq yozuvchisi (1991). Toshkent universitetining jurnalistika fakultetini tugatgan (1963). Dastlabki hikoya va ocherklari 1958-yildan nashr etila boshlagan. “Oq otli” (1962), “Toʻlqinlar” (1963), “Oʻn sakkizga kirmagan kim bor?” (1965) qissalari, shuningdek, yozuvchining shu davrda yozgan hikoyalari “Olis yulduzlar ostida” (1971), “Hayot abadiy” (1974), “Ogʻir tosh koʻchsa…” (1980), “Yoʻllar, yoʻldoshlar” (1984), “Bodom qishda gulladi” (1986), “Togʻlarga qor tushdi” (1987) singari toʻplamlaridan oʻrin olgan. “Soʻnggi bekat” (1976), “Qil koʻprik” (1984), “Yoʻlovchi” (1987), “Olaboʻji” (1992), “Dinozavr” (1-kitob, 1996) kabi romanlar muallifi. “Qora kamar” (1987), “Ziyofat” (1990-yili sahnalashtirilgan) dramalari ham bor. Yozuvchi 2005-yil 29-sentyabrda Toshkent shahrida vafot etgan. Hamza nomidagi Respublika Davlat mukofoti (1989) hamda “Mehnat shuhrati” (1999) ordeni bilan taqdirlangan.