Ozod Moʻmin Xoʻja

Ozod Moʻmin Xoʻja (Moʻminov Ozod Poʻlatovich) 1952-yil 12-noyabrda Toshkentda tugʻilgan. Toshkent Davlat Universiteti Fizika fakultetini tamomlagan. 1975-yili VNIIPromgazning Oʻrta Osiyo filialida injenerlik faoliyatini boshlagan. 1980-yildan to 1990-yilgacha Oʻzbekiston Fanlar Akademiyasi Fizika-Texnika ilmiy-tekshirish institutiga oʻtib, ilmiy xodim sifatida faoliyat olib borgan. Tadqiqotlari asosida fizika-matematika fanlari nomzodi dissertatsiyasini yoqlagan. Katta iqtisodiy foyda keltiruvchi ixtirolari uchun “Sovet Ittifoqi ixtirochisi” medaliga sazovor boʻlgan. Shu yillar davomida adabiyotga qiziqib fantastik hikoyalar bita boshlagan. 1987-yilda “Xiyobondagi uch uchrashuv” fantastik hikoyalar toʻplami, 1989-yilda “Men – robot” kitobi, 1990-yilda “Eng dono ot” kitobi (tarjima asar) bosmadan chiqqan. Shu yillarda uning ayrim asarlari Rossiya va Ukraina matbuotida tarjima qilinib nashr etilgan. 1992-yilda “Buyuk Amir Temurning yoquti” tarixiy asari “Sharq yulduzi” jurnalida va 1993-yili alohida toʻplamda chop etilgan.“Bir yigit va uch qiz hangomasi” hajviy hikoyalari toʻplami (1997), “Sardor “Beshagachskiy” – toza oʻgʻri” kriminal qissasi (2004), “Vahdat ul-haqoyiq” falsafiy traktati (2006),  “Oyjamol” choyxonasi” kriminal trilleri (2007) chop etilgan. 2006-yildan Oʻzbekiston tarixidagi noyob xislatli insonlar hayotiga qiziqib, ularni oʻrgana boshlagan va 2008-yilda buyuk Bahouddin Naqshbandning ustozi haqida “Hazrat Sayid Amir Kulol” nomli tarixiy voqeanomalar asarini yozib tugatgan. 2010-yilda boshqa bir buxorolik noyob inson haqida “Xoʻja Muhammad Parron” deb nomlangan tarixiy voqeanomalar asarini bitgan. Bu asarlar koʻp chigʻiriqlardan oʻtgach, 2012-yil oxirlarida chop etilgan. Ozod Moʻmin Xoʻja 1991-yilda Oʻzbekiston Yozuvchilari Uyushmasiga qabul etilgan.