O‘ktam Mirzayor

Oʻktam Mirzayor 1956 yilning 2 yanvarida Samarqand viloyatining Narpay tumanida tugʻildi. Islom shoir nomidagi 26-oʻrta maktabni aʼlo baholarga bitirib, harbiy xizmatni oʻtab qaytdi (1974–1976). Toshkent Davlat universiteti (hozirgi OʻzMU)ning jurnalistika fakulteti kechki boʻlimida (1974–1982), Hindistondagi Xalqaro ommaviy axborot vositalari institutida (1993–1994) tahsil oldi.
“Oʻzbekiston” nashriyotida korrektor, kichik muharrir, muharrir (1977–1983), “Guliston” jurnalida katta muharrir, boʻlim mudiri, masʼul kotib (1983–1992), Oʻzbekiston Milliy axborot agentligi – OʻzA masʼul kotibi, kotibiyat mudiri, OʻzA muassisligidagi “Respublika” gazetasi bosh muharriri (1992–2001), “Oʻzbekkino” Milliy agentligi Kinochilar uyidan foydalanish boshqarmasi boshligʻi (2001–2010) vazifalarida xizmat qildi.
“Ogoh koʻngil” (1992 yil), “Yaxshi kunlar quvonchi” (1998 yil) sheʼrlar, “Tuproq hidi” (2012 yil),”Amakimning kasali” (2015 yil) kabi hikoyalar toʻplamlari nashr etilgan.
Oʻktam Mirzayor “Shuhrat” medali (1996), “Oʻzbekiston Respublikasi Mustaqilligining 20 yilligi” (2011y.) koʻkrak nishoni bilan taqdirlangan.