Murtazo Mushfiq Kozimiy (1887 – 1978) – Eron yozuvchisi. Zamonaviy fors nasrining asoschilaridan biri. “Erane javan” (“Yosh Eron”) jurnalida bosh muharrir boʻlib ishlagan (1926). Ijodiy faoliyati 20-asrning 20-yillaridan boshlangan. Kozimiyning birinchi yirik asari “Qoʻrqinchli Tehron” (1922) romani hisoblanadi. Romanda Erondagi ijtimoiy hayot, xalq boshiga tushgan qiyinchiliklar, adolatsizliklar, ayollarning ogʻir qismati aks ettirilgan. Romanning 1-qismi “Mahuf” (1921) Tehronda, 2-qismi “Bir kecha xotirasi” (1924) Berlinda nashr etilgan. Kozimiy “Soʻligan gul”, “Qimmatga tushgan rashk” va boshqa romanlar muallifi. Publitsistik asarlari, tarjimalari Eron adabiyotida oʻziga xos oʻrin tutadi. “Qoʻrqinchli Tehron”ning 1-qismi Gʻafur Gʻulom, 2-qismi Sotiboldi Yoʻldoshev tomonidan oʻzbek tiliga tarjima qilingan.