Muhammad Ali (Ahmedov Muhammadali) 1942-yil 1-martda Andijon viloyatining Boʻz tumanida tugʻilgan. Oʻzbekiston xalq yozuvchisi (1992). Moskvadagi M. Gorkiy nomidagi Adabiyot institutini tugatgan (1966). “Fazodagi hislar” (1967), “Shafaq” (1968), “Otalar yurti” (1970), “Dostonlar” (1974), “Oq nur” (1977), “Ilhom parisi” (1980), “Sen bir gulsan” (1989), “Ona duosi” (1994) va boshqa sheʼriy asarlar muallifi.“Ulugʻ saltanat” (2 kitob, 1999) tarixiy romani ham bor. “Sarbadorlar” (1989) roman-dilogiyasi adibning nasrdagi dastlabki asari. “Boqiy dunyo” (1981) sheʼriy romani Jizzax qoʻzgʻoloni voqealariga bagʻishlangan.“Ramayana” (1978), qoraqalpoq eposlari “Shahriyor” (1977), “Masposhsho” (1985), shuningdek, R. Byorns, U. Tabidze, Bayron va boshqa yozuvchilarning asarlarini oʻzbek tiliga tarjima qilgan. Berdaq nomidagi Qoraqalpogʻiston Respublikasi Davlat mukofoti laureati (1984), “Mehnat shuhrati” ordeni bilan mukofotlangan (1999).