Melis Abakirov

Taniqli qirg‘iz yozuvchisi Melis Abakirov 1940-yilda Chuy tumanida tug‘ilgan. Qirg‘iz Davlat universitetining filologiya kulliyotini bitirgach, O‘sh va Chuy viloyatlaridagi maktablarda o‘qituvchilik qiladi. 1965-yildan boshlab vaqtli matbuotda ishlaydi. Talabalik yillaridayoq dastlabki hikoyalari bilan kitobxonlarning e’tiborini qozonadi. Keyinchalik Respublika Davlat Matbuot Qo‘mitasida, “Maktab” hamda “Adabiyot” nashriyotlarida bosh muharrir bo‘lib ishlaydi.
Melis Abakirovning “Yoshlik rapsodiyasi”, “Ko‘kaykesti”, “Qimor”, “Cho‘ng buvimning ertagi”, “Olmali bog‘” kabi bir talay asarlari nashr etilgan. Uning “Qatag‘onda o‘tgan bolalik” deb nomlangan mazkur hujjatli qissasi orqali yozuvchi bolqor va qirg‘iz xalqlarining azaliy do‘stlik rishtalari to‘g‘risida hikoya qiladi.