Lafonten

Lafonten (La Fontaine ) Jan de (1621. 8. 7, Shato–Terri, Shampan – 1695. 13. 4, Parij) – fransuz shoiri, masalchi. Fransiya akademiyasi aʼzosi (1684 y. dan). Mashhur “Psixeya va Kupidonning muhabbati” (1669) qissasiga “Ming bir kecha” ertaklari hamda Apuley (mil. av. 2-a.) ning “Metamorfozalar” asari asos boʻlgan. Lafontenning masal janridagi asarlari koʻproq shuhrat qozongan. “Sheʼriy ertak va hikoyalar” (1–5-kitoblar,1665–85), “Masallar” (1 – 12-kitoblar,1668–94) toʻplamlarida oʻtkir hajvchi, yirik mutafakkir, adabiyotda Uygʻonish davri anʼanalarining davomchisi sifatida maydonga chiqdi. Uning antik davr, Yevropa hamda Sharq adabiyoti (“Kalila va Dimna” va b.), shuningdek, xalq donishmandligidan ruhlanib yaratgan masallari zamonaviyligi, oʻtkir hajvi, tavsiflarning yorqinligi bilan jahon satirik adabiyoti xazinasini boyitdi. Oʻzbek va rus masalchiligi rivojida ham Lafonten ijodining muhim oʻrni bor. “Kosib va doʻkondor” masali oʻzbek tiliga tarjima qilingan (1984).