Ivo Andrich

Ivo Andrich (1892-1975) – serbiyalik atoqli adib. Akademik, diplomat. 1892-yil 9-oktyabr kuni hozirgi Bosniya va Gertsegovina hududidagi maktab xizmatchisi oilasida tavallud topgan. Otasi qazo qilganida boʻlajak adib hali uch yoshga ham toʻlmagan edi. Sobiq Yugoslaviya Qirollik universitetining falsafa fakultetida taʼlim olgan. 1924-yili Bosniya maʼnaviy hayotining rivojiga bagʻishlangan doktorlik ishini himoya qilgan. Yugoslaviyaning Yevropa mamlakatlaridagi elchixonalarida ishlagan. “Drin daryosidagi koʻprik”, “Travnits yilnomasi”, “Xonim” kabi romanlar, koʻplab qissa va hikoyalar muallifi. 1961-yili Nobel mukofotiga sazovor boʻlgan. 1975-yil 13-mart kuni Belgrad shahrida vafot etgan. “Xalq ogʻzaki ijodi – afsonalarni sevishga, afsonalar orqali inson hayotining mazmun-mohiyatini imkon darajasida anglab yetishga harakat qilaylik”, degan daʼvati tilga tushgan.