Hamid Gʻulom 1919-yil 25-aprelda Toshkent shahrida tugʻilgan. Oʻzbekiston xalq yozuvchisi (1979). Oʻzbekistonda xizmat koʻrsatgan sanʼat arbobi (1969). Oʻrta Osiyo industrial institutining ishchilar (1933) va togʻ fakultetlarida (1935–37), Pedagogika institutining rus tili va adabiyoti fakultetida (1938–41) tahsil olgan. “Qasosim bor” (1942), “Haykal” (1943), “Vatan kuylari” (1949), “Yangi bogʻ” (1951), “Qitʼalar uygʻoq” (1960), “Oshiq koʻngil” (1974), “Vafoning uzun yoʻli” (1988) kabi sheʼriy toʻplamlar muallifi. Koʻproq nasriy janrlarda ijod qilgan (“Mashʼal”, 1958–61; “Toshkentliklar”, 1967; “Mangulik”, 1976 va boshqa romanlar). Pyesalar (“Toshbolta oshiq”, 1965), opera teatri uchun “Xorazm qoʻshigʻi” (1964) librettosini yozgan. U. Shekspirning “Oʻn ikki kecha”, Firdavsiyning “Shohnoma”siga kirgan ayrim dostonlar va bir qancha chet el yozuvchilarining asarlarini oʻzbek tiliga tarjima qilgan. “El-yurt hurmati” (1998) va “Mehnat shuhrati” (2004) ordenlari bilan mukofotlangan. 2005-yil 21-avgustda Toshkent shahrida vafot etgan.