Hakim Nazir (Nazarov Hakim Nazirovich) 1915-yil 15-oktyabrda Toshkent shahrida tugʻilgan. Oʻzbekiston xalq yozuvchisi (1984). Toshkent kechki pedagogika institutini (1941) va Moskva Oliy adabiyot kursini tugatgan (1956). Ilk hikoyalar toʻplami – “Qishloqdagi jiyanlarim” (1948). “Koʻkorol chiroqlari” (1954; qayta ishlangani – “Soʻnmas chiroqlar”, 1958), “Suv gadosi…” (1962), “Yonar daryo” (1965), “Koʻkterak shabadasi” (1968), “Kenjatoy” (1976), “Tohir – Zuhra qissasi” (1985), “Dadamni topib beringlar” (1991), “Oq fotiha yoki bolalik sarguzashtlarim” (1995), “Najot” (2005) kabi qissalar, “Chiranma gʻoz – hunaring oz” pyesasi, ocherklar, hikoya va maqolalar muallifi. “Lochin qanotlari” romanida (1973) Ikkinchi jahon urushi davri voqealari aks etgan. A. Gaydar, P. Pavlenko, L. Kassil (“Cheremish – qahramonning ukasi”, qissa), V. Katayev (“Polk oʻgʻli”, qissa) va boshqalarning asarlarini oʻzbek tiliga tarjima qilgan. Hamza nomidagi Oʻzbekiston Davlat mukofoti laureati (1981). “El-yurt hurmati” ordeni bilan mukofotlangan (2000). Hakim Nazir 2008-yil 15-may kuni vafot etgan.