Filip Chesterfild

Chesterfild (Filip Dormen Stenxop, Philip Dormer Stanhope, 4th Earl of Chesterfield) 1694-1773-yillarda yashagan ingliz davlat arbobi, diplomat. Ayni paytda u o‘tkirqalam yozuvchi bo‘lgan. Uning axloq-odob mavzularidagi satirik ruhda yozilgan esselari XVIII asr o‘rtalarida jurnallarda tez-tez chop etilib turgan. Ma’rifatparvarlik ruhi bilan sug‘orilgan asarlari zamon kishisining qiyofasini ochib berish bilan bir paytda, haqiqiy vatan o‘g‘loni, davlat xizmatiga o‘zini tayyorlamoqchi bo‘lgan yosh inson qanday xislatlarni o‘zida mujassamlashtirishi kerak, degan savolga javob berishga qaratilgan. Bu o‘rinda Chesterfildning adabiy merosi orasida “Farzandga maktublar”i alohida ahamiyatga ega.