Evan Xanter (ing. Evan Hunter, asl ismi – Salvatore Albert Lombino, 15-oktyabr 1926, Nyu-York – 6-iyul 2005, Ueston) – amerikalik yozuvchi, ssenarist. Ed Makbeyn (Ed McBain) taxallusi bilan mashhur. 1951-yildan adabiyot agenti  va muharrir sifatida  Artur Klark, Pol Uilyam Anderson, Pelem Grenvil Vudxauz kabi yozuvchilar bilan ishladi. Shu yili “Marsliklar, xush kelibsiz” deb nomlangan birinchi ilmiy-fantastik hikoyasi chop etiladi. Hikoyaga u “S. A. Lombino” deb imzo chekadi. Shundan soʻng yozuvchi Evan Xanter va Xant Kollinz taxalluslari bilan ijod qiladi.  U oʻzining detektiv romanlarini Kurt Kennon, Richard Marsten taxalluslari bilan taqdim etadi. Evan Xanter oʻzining eng mashhur taxallusi Ed Makbeynni ilk bor 1956-yili “Nafratli politsiyachi” romanida qoʻllaydi. Uning asarlari asosida 41 ta film ishlangan.