Nushich Branislav (Branislav Nushiћ) (1864. 8. 10 – Belgrad – 1938. 19. 1) – serb yozuvchisi, dramaturgi. Serbiya Fanlar akademiyasi akademigi. (1933). 1915–18-yillarda muhojirlikda yashagan. Oʻtkir hajviy asarlarida Serbiyada siyosiy tuturiqsizliklarni, saylovlarning soxtaligini, politsiya byurokratizmini qattiq qoralagan (“Xalq deputati”, 1883; “Protektsiya”, 1888; “Oddiy kishi”, 1899 va b.).
“Ramazon oqshomlari” (1898, hikoyalar toʻplami), “Tashula” (1902) qissasi sharq ekzotikasi mavzusiga bagʻishlangan. Nushich “Bir ming toʻqqiz yuz oʻn beshinchi yil” (1916) asarida vatanparvarlarning 1-jahon urushiga nafratini ifodalagan.
“Mister dollar” (1932), “Iztirob chekkan oila” (1935), “Doktor” (1936), “Murda” (1937) komediyalari Nushich satirik isteʼdodining yangi parvozi boʻlgan. Nushich ijodi hajviy va yumoristik pafosining kuchliligi bilan jahon adabiyotida muhim oʻrin tutadi va koʻplab yozuvchilar ijodiga samarali taʼsir koʻrsatib kelmoqda.
Asarlari oʻzbek tiliga tarjima qilingan (“Tarjimai holim”, 1970; “Kikandon mashmashalari”, 1981 va b.).