Ayzek Azimov

Amerikalik fantast yozuvchi, fan targʻibotchisi. Belorussiyaning Petrovichi qishlogʻida tugʻilgan. 1923-yilda ota-onasi bilan Nyu-York shahriga koʻchib ketgan. Oʻsha yerda Kolumbiya universitetini tugatgan. Mutaxassisligi bioximik. Ilmiy tadqiqotlari uchun falsafa doktori unvonini olgan.
Birinchi qissasi 1939-yili eʼlon qilingan. Shundan soʻng “Poydevor va Imperiya” (1952), “Men robotman”, “Mangulik intihosi” (1955), “Neytrino”, “Darbadar” (1966), “Koinot oqimlari” (1972), “Poydevor qirralari” (1982), “Poydevor va Yer” (1986) asarlarini eʼlon qildi. Azimov fantastikaga intellektual nasr unsurlarini kiritdi va uni badiiy nasrga yaqinlashtirdi. Bundan tashqari asarlaridan ijtimoiy muammolar ham oʻrin olgan. Azimov ilmiy fantastika asoschilaridan biri.
Azimovning bir qancha hikoyalari va “Koinot oqimlari” romani oʻzbek tiliga tarjima qilingan.