Abu Ali al-Muhassin at-Tanuhiy 10-asrda yashab, ijod etgan arab adibi. U 940-yilda Basra shahrida tug‘ilgan. Fiqh ilmidan puxta ma’lumot olib, o‘tmishda yashagan xalifalar, vazirlar, amirlar, olimlar, faqihlar, shoirlar haqida eshitgan rivoyat va hikoyatlarni to‘plab borgan.
At-Tanuhiy o‘rta asrlar arab adabiyotida avvalo bir necha mo‘tabar tazkira (antologiya)si bilan o‘chmas iz qoldirdi. Ulardan eng muhimi “Maroqli hikoyatlar”dir. Asarning asl nomi “Nishvar al-muhozara va axbor al-muzokara”, (“Suhbatdoshlar tilidan yozib olingan maroqli hikoyatlar”)dir. Majmua turli davralarda, suhbatlarda hamkasblari, do‘stlari, qarindoshlari, tanish-bilishlaridan eshitgan turfa rivoyat, hikoyat, latifa, tarixiy voqea-hodisalar asosida yaratilgan lavhalardan iborat.
At-Tanuhiyning o‘n bir jilddan iborat ushbu asarining atigi bir necha jildigina saqlanib qolgan. Bularning tanqidiy matni Parij, Istanbul, Damashq va boshqa joylardagi qo‘lyozma nusxalar asosida 1971–1973-yillarda Bayrut shahrida Abbud ash-Shaljiy tomonidan chop etilgan.