Abduqahhor Ibrohimov

Abduqahhor Ibrohimov Toshkentning Koʻkcha dahasida 1939-yilning 16-avgustida dunyoga kelgan. 1957-1962-yillarda Toshkent Davlat universitetining jurnalistika fakultetida tahsil olgan. 1975-1977-yillarda Moskvadagi Oliy adabiyot kursida oʻqigan. Respublika Madaniyat ishlari vazirligi qoshidagi Sanʼat ishlari boshqarmasida bosh muharrir, 1990-1993-yillarda Respublika Prezidenti Devonida maslahatchi sifatida faoliyat koʻrsatadi. 1994-yildan buyon esa Respublika «Maʼnaviyat va maʼrifat» markazida xizmat qilmoqda. Abduqahhor Ibrohimovning «Arra», «Meni aytdi demang», «Zoʻldir», «Bir oʻlikka bir tirik», «Bu zamon oʻgʻloni», «Tusmol», «Sochqi», «Mayli, mayli», «Ofarin», «Puch», «Shayton yoʻli» komediyalari Toshkent va viloyat teatrlari sahnalarida qoʻyilgan. Unga «Oʻzbekistonda xizmat koʻrsatgan sanʼat arbobi» faxriy unvoni, «Mehnat shuhrati» ordeni berilgan. U keyingi paytda «Vatan tuygʻusi» (hamkorlikda), «Bizkim, oʻzbeklar…», «Davlat tafakkuri nima?», «Millat ovozi» kabi yirik publitsistik kitoblarini va «Uyqu kelmas kechalar» romanining birinchi jildini oʻquvchilarga taqdim etdi.
2020-yil 20-iyun kuni vafot etgan.